Tontosa omaly alakamisy 25 oktobra teto Toliara ny Fitsarana ireo olona telo, roalahy sy vehivavy iray, nahatrarana sokatra miisa 10 196 tao Betsinjaka, Toliara tamin'ny aprily 2018.

Sazy enin-taona an-tranomaizina, sazy mihatra miampy onitra 30 tapitrisa Ariary, arotsaka ho an'ny fiadidiam-paritry ny tontolo iainana Atsimo Andrefana, ary lamandy 100 tapitrisa Ariary ny sazin'izy ireo.

Namoahan'ny Fitsarana didy fisamborana kosa ny lehilahy iray antsoina hoe : Lahady Ledjee voasaringotra amin'ity raharaha ity.

Nisy teratany Sinoa roalahy ihany koa voarohirohy tamina trafika sokatra hafa nitranga tamin'ny volana aprily 2018. Notsaraina omaly izy ireo.

Sazy enin-taona an-tranomaizina, sazy mihatra miampy onitra 50 tapitrisa Ariary, arotsaka ho an'ny fiadidiam-paritry ny tontolo iainana Atsimo Andrefana, ary lamandy 100 tapitrisa Ariary no didy navoakan'ny Fitsarana ambaratonga voalohany teto Toliara.